Ang Bili sa Piso

11 Feb Ang Bili sa Piso

“Jun, niay piso o. Nakit-an nako ganina samtang nanilhig ko sa imong kwarto. Hipusa ni,” sugyot ni Nanay Luz sa iyang anak nga otso ang edad.

“Imo na lang na, ‘Nay. Wala namay bili ang piso karon. Wala na koy mapalit ana,” balibad ni Jun.

“O sige.” Gisuksok sa inahan ang piso sa iyang bulsa ug namalandong sa tubag sa iyang anak.

Niadto si Jun sa kusina aron moinom og tubig. Sa kilid sa pridyidir, nakakita siya og tulo ka baynte-singkong sentabo. Wala niya kini gipunit. “Wa man gani nako gihipos ang piso ni Nanay,” ingon niya.

Nilingkod si Jun sa sala aron motan-aw og TV. Sa ilalom sa lamesa, nakakita siya og duha ka diyes nga sentabo. Wala niya kini gipunit. “Wa man gani nako gipunit ang tulo ka baynte-singko,” ingon niya.

Niadto si Jun sa banyo aron mangihi. Sa may pultahan, nakakita siya og usa ka singko nga sentabo. Wala niya kini gipunit. “Wa man gani nako gipunit ang duha ka diyes,” ingon niya.

Taudtaod gisugo ni Nanay Luz si Jun.

“Palit sa og kitsap sa tindahan kay atong tuslu-an sa atong sud-an. Diara ang kuwarta.”

Gidunol ni Nanay Luz ang usa ka tapok nga sinsilyo gikan sa iyang bulsa. Gidawat ni Jun ang kuwarta ug diretsong nilakaw padulong sa tindahan.

Apan nabalik si Jun gikan sa tindahan nga nagmug-ot. Iyang tuong kamot hugot nga nagkumkom sa mga sinsilyo.

“Wala ko kapalit, ‘Nay. Kuwang diay ang imong gihatag nga kuwarta mao nga wa ko hatagi sa tindera og kitsap,” may pagkabug-at nga sulti ni Jun.

“Pila diay ang kuwang ‘nak?”

“Piso ra gyod, ‘Nay.”

Mokuot na unta sa bulsa si Nanay Luz apan dali-daling niadto si Jun sa kusina, sala ug banyo.

Sa kusina, iyang gipunit ang tulo ka baynte-singkong sentabo ug niingon, “Walay piso kon walay baynte-singko.”

Sa sala, iyang gipunit ang duha ka diyes nga sentabo ug niingon, “Walay baynte-singko kon walay diyes.”

Sa banyo, iyang gipunit ang usa ka singko nga sentabo ug niingon, “Walay diyes kon walay singko.”

Giihap niya ang mga nakit-ang sentimo. “Tulo ka baynte-singko, duha ka diyes ug usa ka singko. Ayos, naa na koy ikadugang nga piso.”

Iyang kining gipakita kay Nanay Luz ug nananghid, “’Nay, pwede nako ni idugang og pampalit sa kitsap?”

“Pwede kaayo ‘nak.”

Nabalik si Jun gikan sa tindahan nga hayag na ang nawong. Iyang gitunol ang kitsap sa iyang inahan.

“Kasabot nako nganong gipahipos nimo sa ako ang piso ganiha, ‘Nay. Bisan unsa diay ka gamay sa usa ka butang, aduna kini bili.”

Nagpahiyom si Nanay Luz kang Jun. Naa pa niya ang piso nga iyang gituyo og pabilin sa iyang bulsa.